Хүслийн овоо

Тэнгэр зорьсон аавыг минь тамгалсан

Тэнүүн талын эхэн дэх цагаан овоо

Тодоос тод харагдах

Торгоны хээтэй хийморийн овоо

Тойроод алхаж явахад

Та минь сэтгэлд бодогдоно

Тэртээд хөвөх сэмжин үүлэнд

Таны минь дүр тодорч харагдана

Алсад одсон аавыг минь орлох

Арвагарын тал дах цагаан овоо

Алаг дэлхийн бөөрөн дэх

Алганы хээтэй хийморийн овоо

Илбэн үлээх зөөлөн салхи нь

Ерөөлөө хэлэх мэт сонсогдоно

Өргөсөн идээ будаа нь

Өөрт минь үржин эргэж ирнэ

Хол явсан аавыг минь санагдуулах

Хязгааргүй талын эхэн дэх хөх овоо

Хүсэл бүхэн биелэх

Хүүхдүүдийнх нь шүтдэг хийморийн овоо

Чулуу нэмэн зогсож байхад

Чанадаас та минь ширтэх мэт санагдана

Хацар алгадах сэвшээ салхи нь

Хайраа хүүдээ илгээх мэт үлээнэ

Тэнгэр зорьсон аавыг минь тамгалсан

Тэнүүн талын эхэн дэх цагаан овоо

Хүсэл бүхэн биелэх

Хүүхдүүдийнх нь шүтдэг хүслийн овоо

                                                                         Н.Энхболд      2017 он